Infokutaisi.com | v.2

თუ გასულ წელს საბუნებისმეტყველო საგნებში გამოცდა ერთად ბარდებოდა, წელს ამ მხრივ სიახლეა და აბიტურიენტებს ცალ-ცალკე მოუწევთ გამოცდების ჩაბარება ფიზიკაში (20 ივლისს), ბიოლოგიაში (21 ივლისს), გეოგრაფიაში (22 ივლისს) და ქიმიაში (23 ივლისს).

ეროვნული გამოცდების პარალელურად წელს პირველად ტარდება პედაგოგთა სასერთიფიკაციო გამოცდები. ქუთაისში ამ მიზნით ორი საგამოცდო ცენტრია გახსნილი: N1 და N41 საჯარო სკოლებში.

როგორც ეროვნული გამოცდების ცენტრის ადმინისტრაციის ხელმძღვანელმა ზეინაბ ხაჩიძემ გვითხრა, მზადება გამოცდებისთვის უკვე ერთი თვეა რაც დაიწყეს და ეს სამზადისი ფაქტიურად უკვე დასრულებულია. დარჩა მხოლოდ მერხებისა და სექტორების დანომრვა, ნიშნულების გაკვრა. ჩამოტანილია კომპიუტერული ტექნიკა, რომელთა საშუალებით პედაგოგები უცხო ენაში გაივლიან სასერთიფიკაციო გამოცდებს.

N1 საჯარო სკოლაში არსებული საგამოცდო ცენტრში უკვე 4000-მდე პედაგოგია რეგისტრირებული.

„ბუნებრივია, არ გამოვრიცხავთ პრობლემებს გამოცდების მიმდინარეობის დროს, ალბათ იქნება წესების დარღვევის მცდელობაც, თუმცა მოვუწოდებთ პედაგოგებს იყვნენ კანონმორჩილნი და საგამოცდო ცენტრის ადმინისტრაცია მაქსიმალურად კომფორტულ პირობებს შეუქმნის მაღალი შედეგების საჩვენებლად“, - განაცხადა ზეინაბ ხაჩიძემ.